تفاصيل

شغّل الغنيّة قبل تقرأ ^^

ضوّي غير مبهر، فلجأت للكتابة
بالنهاية كلنا محتاجين قبول، حوّلي المدينة ع غابة.
بصيبك بالكآبة إذا بعيّن.. صدّقي
بس بهرب من الحزب كلما يحاول إستقطابي.
قصدي قول حزن بس الباء طبشت بالنون 
وكان فيي أقصد الجنون بدل المشفى
تركت التنين قعدت بالبيت قررت على وضعي أغفى
والنوم صديق غير متوقّع، لما يروح ما عاد يجي ولما يصير يجي بدّك تدفّشو ليطلع.
المخدّة كراج، وغرفتي مدينة
عالشام يا حلو؟ عالشام يا حزينة؟
أنا بغرق بشبر حنين وهيّ بتغرق بقنينة والتنين ما فيهن مي
وأنا المي ما بترويني.
.
حلوة متل كلمات من لغات عم تنقرض لسا منتداولها
"حْدَيْ مْدَيْ" أو "أزعر" مثلاً
فكل ما تجي تتغزّل فيها رح يفشل غزلك
حلوة متل العفوية، بس لبسك خجلك.
لا تسكت! صوت راسك مسموع
غطّي عليه احكي بأي موضوع قول أنّك بتحب المبالغة أو بتكره هَبّلك.
قلها أنو الأشياء لما تثبت بتفقد جمالها
قلها أنو حتّى لو فيها تخبّيك، البطل ما بيساع لا بكندرتها ولا بطرف شالها
وع سيرة البطل، قلها أنه شخصية وهمية جوّاتك بتطلع كل ما يجي عبالها، وبتزعل إذا بتتركها لحالها.
ولو كان بيناتنا حاجز، أي صاروا ميّة
ولو كان بيناتنا حروف كنا صغنا أبجديّة
ومنقطع لو مسافة، ومنرجع لما تخافي
لو كنتِ حقيقة كنت رح حبّك، بس أنتِ خرافة.

تفاصيل - الدرويش

.